Déjà vu

Wednesday, February 22, 2006

Ek Kahani...

Pehli baar jab tumhe dekha, to laga ki tum khoobsurat ho,
Pehli baar jab tumse baat ki, to laga tum pyaar ke kabil ho,
Pehli baar jab hum saath the to laga woh pal ruk jaye,
Pehli baar jab tumhe chua, toh laga ki waqt tham jaye.

Phir mulakatein badhi, pyar badha, hum tum saath the,
Pal, din, mahine, nikalte gaye aur hum saath har cheez se joojhte rahe,
Tum mere liye woh bani, jo shayad aur koi nahi ban sakta,
Tumne mere liye woh kiya jo shayad aur koi nahi kar sakta.

Mujhe yaad hai har lamha, tumhare saath guzara hua,
Mujhe rula deteeinh hain woh yaadein, jo kabhi hue the,
Jab yaad aati hain woh raatein, saath guzari hui,
Jab yaad aati hain woh baatein, ek doosre se kahi hui,
Jee karta hain, wapas un yaadon mein doob jaaoon,
Jee karta hai wapas tumhe kaash paa paoon.

Kuch lamhe the hum dono ke, jo hamesha yaad rahenge mujhe,
Woh pal the yaadgaar, jo kabhi hum bhool na payenge.
Har avsar par saath hona, har baat pe ek doosre ko pyaar karna,
Har mauke par ek doosre ke hothon se khelna,
Har baat sabse pehle ek doosre ko batana,
Yahi pyaar hai humara, jo har koi nahi paa sakta.

Aaj bhi woh din yaad hai mujhe, jab tumne wada kiya tha, hamesha saath nibhane ka,
Par aaj tum saath nahi ho, par tumse shikva nahi hai mujhe,
Shayad yeh hamari kismat thi ki tumhari zindagi mein saath na reh paye,
Shayad ye hamari khush kismati thi ki tumse kabhi pyaar kiya.

Tumse wada kiya tha maine ki hamesha tumhe chahoonga,
Aaj tum door ho to kya, tumhare liye aaj bhi jaan de doonga.
Tum khush raho, bas yahi dua hai meri,
Muskurate raho, bas yahi asha hai meri.

Sochta hoon, ek din tumhe zaroor bataoonga, ki tumhe kitna yaad kiya,
Sochta hoon, ek din tumhe apni bahon mein lekar phir se pyaar kar sakoonga,
Sochta hoon ki tum kaisi hogi, kya kar rahi hogi,
Shayad hamara bhram hai ki tumse phir kabhi mulakat hogi.

Yaad aate hain, woh pal jo saath bitayein,
Yaad aati hai woh baatein jo saalon pehle tumhe sunaye.
Yaad karne se kya hoga, jo tum saath nahi ho,
Yaad karne se kya hoga, jo tum aaj door ho,
Itni door ki pahunch bhi nahi sakta yeh pagal,
Itni door ki chahoon bhi to door kar dogi tum.

Har lamha un palon ko soch kar nikalta hain,
Har lamha tumhari yaadon mein guzarta hain,
Aaj phir woh kahani yaad aayi hai mujhe,
Jo tumne kabhi ek geet mein piro kar sunayi thi mujhe,
Woh ladki pagal thi us ladke ke liye,par usne samjha nahi,
Chala gaya ek din, par laut kar jab aya, to us ladki ne apna pyaar kisi aur ko de diya tha,
Intezaar karoonga main, us ladke ne kaha,
Chala gaya zindagi se door, apni ashayein liye.

Hum bhi khade hain unhi rahon par, jahan hum kabhi saath the,
Yaad aati hai tumhari woh phool si muskurahat, jo mere dil ki dhadkan thi,
Mohabbat hai tumse aaj bhi, isme koi dohrai nahi,
Tum saath na sahi, tumhari yaadein hi nasha hain, sach baat hai yahi.

2 Comments:

At 11:53 PM, Anonymous Anonymous said...

There should be word limits on what peaople blog!!! "Damn" these lovers.....

 
At 1:22 AM, Blogger Just me said...

wow..come to think of it..ur trying to curb the creative thot process..:-)..who is this mr. / ms. anonymous anyways..?

 

Post a Comment

Links to this post:

Create a Link

<< Home